అనంత పద్మనాభుడి నుండి అరుణా చలేశ్వరుని దాకా -3
చిదంబరేశ్వర సందర్శనం
9-2-14-ఆదివారం చెన్నై ట్రెయిన్ లో పగలంతా ప్రయాణం .తిరుచ్చి మదురా తిరునల్వేలి వగైరా స్టేషన్ లు దాటి ప్రయాణం చేసింది రైలు .అక్కడ కులోత్తుంగ స్టేషన్ లో ప్లాట్ ఫాం పై వేస్తూన్న వేడి వేడి ఇడ్లీలు వడలు కొని తిన్నాం రుచికరం గా ఉన్నాయి .అంతకు ముందే నేను బ్రష్ చేసి సంధ్య ,పూజా పారాయణ చేశాను .కాఫీ త్రాగాం .ప్రదేశాలాలను చూస్తూ కాలక్షేపం ,మా మనవడు సంకల్ప్ తంజావూర్ లో బి టెక్ ఫైనల్ లో ఉన్నాడు.ట్రిచి మీదుగా ట్రెయిన్ వెళ్తుందని ముందు మాకు తెలియదు .తెలిస్తే వాడికి ఫోన్ చేసి స్టేషన్ కు రమ్మనే వాళ్ళం.ట్రిచి స్టేషన్ దాటిన తర్వాత అని పించింది .సరే .సాయంత్రం నాలుగు పదికి విరుదా చలం జంక్షన్ చేరాం .
సామాన్లను మేమే దింపుకొని ,స్టేషన్ బయటికి వచ్చాం .అక్కడి నుండి బస్ మీద చిదంబరం వెళ్లాలని మొదట అనుకొన్నాం .కాని ఇక్కడి నుండి కారు మాట్లాడుకొని సరాసరి వెడితే రాత్రి దర్శనం కలుగుతుందని వెంటనే నిర్ణయించి పన్నెండు వందలకు కారు మాట్లాడుకొని చిదంబరం ఆరు గంటలకు చేరాం .మేము బుక్ చేసుకొన్న హోటల్ పేరు ‘’అక్షయ్ ‘’.సింగిల్ రూమ్ కు రెండు వేల రూపాయలు కట్టాం .నాలుగు బెడ్స్ .విశాలం గా బాగా నీట్ గా ఉంది .కాఫీ తెప్పించి తాగి స్నానాలు చేసేశాం .ఎడుమ్బావుకు నలభై రూపాయలిచ్చి చిదంబరం దేవాలయానికి చేరుకొన్నాం హోటల్ కు చాలా దగ్గరే సమయం చాలదని ఆటో లో వెళ్లాం .అప్పటికే ఎనిమిదయింది .సేవల కోసం ఇరవై నిమిషాలు దర్శనం ఆపేశారు .ఎనిమిదిన్నరకు దర్శనానికి అనుమతించారు .చాలా దూరం నుంచే దర్శనం .నటరాజ స్వామి సరిగ్గా కనీ పించలేదు .గర్భ గుడి అంతా చీకటి .నల్ల విగ్రహం .హారతి దీపం వెలుగు లో దర్శనం చేయాలి .నాకేమీ సంతృప్తి నివ్వలేదు ఇంతదూరం ఆశ పడి వచ్చి ఇదేమిటి అని పించింది. పూజారులు లోపలి బయటికి తిరుగుతూ విగ్రహానికి అడ్డం వస్తూ చిరాకు కల్గించారు .అప్పుడు నేను కేక లేశాను పూజారుల మీద .’’ఇంత దూరంఇంత డబ్బులు ఖర్చు పెట్టి మీ ప్రుస్టభాగాలను చూడ టానికి రాలేదు. మేము దేవుని ముఖం చూడ టానికే వచ్చాం తప్పుకొండి ‘’అనిఇంగ్లీష్ లో అరిచాను .అప్పుడు పక్కకు తప్పుకున్నారు .అప్పుడు కొంచెం దర్శనం బాగా అయింది . డబ్బులు దొబ్బి లోపలి పంపిస్తున్నారని తర్వాతా తెలిసింది. కేరళలోఅనంత పద్మనాభుడి గుడిలో దర్శనానికి నూట యాభై రూపాయల స్పెషల్ టికెట్లు తీసుకొన్నాం .దానితో బాటు వాళ్ళు పూజా సామగ్రి ఇచ్చారు .దర్శనం తర్వాతా ప్రసాదం పంచామృతం ఇచ్చారు .గురవాయూర్ లో దర్శనం ఫ్రీ .ఇక్కడ పది చేతిలో పెడితే స్వర్ణ మందిరం లోకి ప్రవేశం కల్పించి దర్శనం చేయిస్తున్నారు .ఈ విషయం దర్శనం తర్వాతే తెలిసింది .ఉదయం దర్శనం డబ్బులిచ్చి చేయాలను కొన్నామ్ .అక్కడే శ్రీ గోవింద రాజ స్వామి దర్శనం చేశాం
అమ్మ వారు శివ కామి దర్శనం కు వేళ అయిపొయింది. గుడి మూసేశారని చెప్పారు . దర్శనం తర్వాతా ఫోటోలు కొని హోటల్ కు నడిచి వెళ్లి అన్నం లేక పోతే ఇడ్లీ తిని రూమ్ కు నడిచి చేరాం .హాయిగా రూమ్ లో నిద్ర పోయాం .
10-2-14- సోమవారం తెల్ల వారు ఝామునే లేచి అన్నీ పూర్తీ చేసుకొని ఇరవై ఏడు కిలో మీటర్ల దూరం లో ఉన్న ‘’వైదీశ్వరాలయం ‘’కు హోటల్ వాళ్ళ తో కారును తొమ్మిది వందల రూపాయలకు మాట్లాడుకొని ఆరు గంటలకే బయల్దేరాం .అక్కడ ఉన్న శివుడు సకల రోగ నివారకుడు .వైద్య నాద శివుడన్నమాట
. వైదీశ్వరుడు అంటారు .చాలా ప్రాచీన దేవాలయం .గొప్ప మహిమ గల శివుడు .అంగారక క్షేత్రం గా కూడా ప్రసిద్ధి .అంగారక దోషం ఉన్న వారు అంటే కుజ దోషం ఉన్న వారు ఈ శివుడిని అర్చిస్తే దోష హరం అవుతుంది .పతంజలి విగ్రహం అగస్త్య మహా ముని విగ్రహం ఉన్నాయి .పెళ్ళిళ్ళు జోరుగా ఆలయం లో జరుగుతున్నాయి .మహా సందడి గా ఉంది .ఇక్కడే శ్రీ రాముడు జటాయువుకు దహన సంస్కారాలు చేశాడు. అది గుడిలోనే ఉంది .దీన్ని జటాయు తీర్ధం అంటారు .ఇక్కడ కోనేరు ను ‘’అమృత పుష్కరిణి ‘’అంటారు ఈ జలం సర్వ రోగ నివారిణి .సీసాలతో పట్టుకొని ఇంటికి తెచ్చుకున్నాం .శిరస్సున అక్కడే చల్లు కొన్నాం .అమ్మవారు కాళీ మాత రూపం .ఇది నాడీ జ్యోతిషానికి పేరున్న కేంద్రం .అగస్త్యుడే నాడీ జ్యోతిష్యాన్ని ఇక్కడ ఏర్పాటు చేశాడట .ప్రసాదాలు కొని ,తిని కారులో ఎనిమిదిన్నరకు హోటల్ అక్షయ్ కు చేరుకొన్నాం .వాళ్ళ షెడ్యూల్ లో ఈ రోజు మాకు బ్రేక్ ఫాస్ట్ ఉచితం .రెస్టారెంట్ కు వెళ్లి ఇడ్లీ, గారే, ఊతప్పం తిన్నాం వడలు మహా రుచిగా ఉన్నాయి .కారప్పొడి కమ్మగా రుచిగా ఉంది .గారెలతో పొట్ట నిమ్పుకోన్నాం. ఎన్నైనా తినచ్చు లిమిట్ లేదు .కాఫీ త్రాగాం .సామాన్లు రూమ్ లో పడేశాం
సోమవారం శివ దర్శనం మహదానందం గా ఉంది .నడిచి నటరాజ స్వామి ఆలయానికి చేరుకొన్నాం .నలభై ఎకరాల ఆలయం ఇది అనేక ప్రాకారాలు శిలా స్తంభాలు నాట్య రీతులున్న శిల్పాలు అంతా కన్నుల పండువు గా దర్శించాలి .మనిషికి యాభై రూపాయలు చేతిలో పెట్టి నటరాజ స్వామిని దగ్గర గా చూశాం .తనివి తీరా చూడ గలిగాం ఆ భంగిమ చూసి తరించాం .నటరాజు గురించి వర్ణించి రాశాను కాని స్వయం గా చూడటం ఇదే ..చరితార్ధకమయింది నా జన్మ .అక్కడి నుండి అమ్మవారు ‘’శివకామి’’ ఆలయానికి వెళ్లాం .అక్కడ పై కప్పు మీద చక్కని వర్ణ చిత్రాలతో పార్వతీ కళ్యాణ ఘట్టాలు పులకింప జేశాయి .చిలక ముక్కు ఉన్న శుక మహర్షి చిత్రం మహాద్భుతంగా ఉంది .రాంబాబు ఫోటోలు తీయ బోతే కోప్పడి వెంటబడితే బయటికి పరుగెత్తుకొని పారిపోయాడు .నేను ఎవరి కంట పడకుండా ఫోటోలు నోక్కేశాను .నా జోలికి ఎవరూ రాలేదు .వాడు త్రివేండ్రం లో రవి వర్మ చిత్ర పటాలను ఫోటో తీస్తూ దొరికి పోయాడు .వాటిని అక్కడి మేనేజర్ కెమేరా లాక్కుని తొలగించింది కూడా .నేను తీశాను కానీ చిక్కలేదు .డబ్బు కట్టి ఫోటోలు తీసుకోవచ్చు ఎక్కడైనా .అన్నీ తిరిగి చూసి పన్నెండు గంటలకు నడిచి రూమ్ కు చేరుకొన్నాం .సామాన్లను తీసుకొని ఎదురుగా ఉండే బస్ స్టాండ్ కు చేరాం .మధ్యాహ్నం ఒకటి ఇరవైకి బయల్దేరే బస్ లో ఎక్కి మనిషికి డెబ్భై రూపాయల చార్జి తో తిరువన్నామలై బయల్దేరాం
తిరువన్నామలై
.సాయంత్రం అయిదున్నరకు తిరువన్నామలై చేరుకొన్నాం .బస్ స్టాండ్ దగ్గరే ఉన్న హోటల్’’ ఆకాష్ ‘’లో నాలుగు వందల యాభై రూపాయల చొప్పున రెండు రూములు ఇదివరకే బుక్ చేసుకోన్నాం .వెళ్లి కాఫీ తెప్పించుకొని త్రాగి స్నానాలు చేసి అరుణాచలేశ్వర దర్శనానికి బయల్దేరాం .అరుణా చల శివ దర్శనం కండ్లారా పొంది అమ్మవారినీ దర్శించి ,ఇడ్లీ లను హోటల్ లో తిని రూమ్ కు వచ్చి హాయిగా నిద్ర పోయాం .ఇలాగ మాకు మాఘ మాసం పవిత్ర సోమ వారం నాడు వైదీశ్వర ,చిదంబరేశ్వర అరుణాచలేశ్వరశివ దర్శనం లభించింది అన్న మాట .చరితార్ధమైన రోజు గా ఈ రోజు మిగిలి పోయింది మాకు .
సశేషం
మీ –గబ్బిట దుర్గా ప్రసాద్ -15-2-14-ఉయ్యూరు
అనంత పద్మనాభుడి నుండి అరుణా చలేశ్వరుని దాకా -4(చివరి భాగం )
సరసభారతి ఉయ్యూరు 