सरोज यादव, विराटनगर ।
पूर्व सांसदहरुको संगठन पूर्व सांसद मञ्चले विद्यमान् निर्वाचन प्रणाली परिवर्तनका लागि छलफल चलाउने भएको छ । विराटनगरमा बिहीबार पत्रकार सम्मेलन गर्दै पूर्व सांसदहरुले निर्वाचन अत्याधिक खर्चिलो भएको सर्वसाधरण जनताको प्रतिनिधित्व हुन नसक्ने अवस्था सिर्जना भएको भन्दै प्रणाली परिवर्तनका लागि छलफल गर्ने भएको हो ।
विराटनगरमा चैत २ गते हुने उक्त छलफलले निर्वाचन प्रणालीमा भएका त्रुटी, कानूनका कारण भएको अप्ठ्यारो तथा संविधानमा निर्वाचन प्रणालीका विषयमा पनि समस्या रहे नरहेको विषयमा छलफल हुने पूर्व सांसद घनेन्द्र बस्नेतले बताए ।
यस्तै कार्यक्रमका अवसरमा संविधान कार्यान्वयनका सम्बन्धमा भएका काम, सरकारले अबलम्बन गरेको समृद्ध नेपाल सुखी नेपालीको नारा सार्थक भएनभएको विषयमा पनि छलफल हुने बस्नेतले बताए ।
विद्यमान राजनीतिक विषयमा पनि छलफल हुने बताए । विप्लव नेतृत्वको नेकपाले हतियार उठाउने गरि हिंसात्मक आन्दोलन गर्नुको औचित्य अहिलेको सन्दर्भमा नरहेको उनले बताए । पूर्व सांसद मञ्च दुई दशक अगाडि स्थापना भएको पूर्व सांसदहरु आबद्ध संस्था हो ।
लोकतन्त्रको सृद्धिढीकरणका लागि भन्दै मञ्चले विभिन्न प्रदेश तथा जिल्लाहरुमा समसामयिक विषयहरुमा कार्यक्रम गर्दै आएको छ ।