Sangguniang Bayan sang San Enrique ang nagpasar sang resolution nga naga paidalom sang banwa sa state of calamity bangud sang kadamuon sang nagkalamatay nga baboy.
Suno kay Vice Mayor Carlo Magno, sang nagligad nga semana nag pasar ang SB sang resolution kag suno sa iya ini ang kabahin sang ila nga pagpabutyag sang sentimiento sa sitwasyon sang banwa kasunod sang pagkapatay sang mga baboy bangud sang hog cholera kag iban pa gid nga balatian.
Suno kay Magno luyag nila ipakita ang ila sentimiento sa mga pumuluyo.
“Ang SB nag pass sila resolution declaring our municipality under a state of calamity. Actually daw mere sentiment man lang na sang Sangguniang Bayan to show support para ipakita man namon sa tawo ga sympathize kami”, suno kay Magno.
Sa datus sang Provincial Veterinary Office ang banwa sang San Enrique ang may pinakamataas nga mortality rate. 1,838 ang yara sa report as of May 22.
Masobra sa katunga sa 2,692 nga hog population ang apektado.
Pero, wala sang request gikan sa Municipal Disaster Risk Reduction Management Council para sa amo nga deklarasyon.
Suno kay Magno sila ang naga hulat sang request kag kun ano man ang mangin tikang sang executive branch, sila ang maga suporta sini.
Ang pagdeklarar sang state of calamity nagatugot sang pag gamit sang calamity fund.
May 369 ka mga hog raisers ang apektado.
Damlag pa gin siling ni Mayor Jilson Tubillara nga ang tanan nga barangay ang apektado sang hog cholera sa ila nga banwa.