सैनिक ‘कू’ को चार महिनासम्म पनि म्यानमारमा प्रदर्शन जारी,प्रदर्शन रोक्न असफल बन्दै सेना
सत्ता कब्जा गरेको चार महिनापछि पनि म्यानमारको सेना प्रदर्शन रोक्न असफल भएको छ । प्रजातन्त्रको पुर्नवाहली र नेतृ आङसाङ सूची सहितका नेताहरूको रिहाइको माग गर्दै अहिले पनि विभिन्न क्षेत्रमा प्रदर्शन भएको छ ।
प्रजातन्त्रवादी समर्थकहरू धेरै जिल्लाहरूमा मंगलबार सडकमा उत्रेका छन् । प्रमुख व्यापारिक केन्द्र यान्गुनमा युवा प्रदर्शनकारीहरूको एउटा ठूलो समूहले सेनाविरोधी प्रदर्शन गरेका छन् ।
प्रदर्शनका क्रममा थुप्रै स्थानमा सुरक्षाकर्मी र प्रदर्शनकारीबीच व्यापक झडप भएको छ । प्रदर्शनकारीमाथि सुरक्षा बलको क्रुर कारबाहीका कारण म्यानमारको सेनाविरुद्ध विश्व समुदायले आलोचना गरिरहेका छन् । यद्यपि म्यानमारको सेनाले आंग सान सुची उहाँको पार्टीका वरिष्ठ नेताहरूलाई अझै रिहा गरेको छैन । जसका कारण देशव्यापी विरोध प्रदर्शन र हड्तालहरू निम्त्याएको थियो ।
म्यानमारको सेनाले गत नोभेम्बरमा सम्पन्न निर्वाचनमा धाँधली भएको भन्दै गत फेब्रुअरी १ मा सत्ता हत्याएको थियो । सैन्य कू भए यता विरोध प्रदर्शनकारीलाई दमन गर्ने क्रममा सयौंको ज्यान गइसकेको छ। यसले कैयौँ वर्षको शान्तिपछि अब उक्त समूह र सेनाबीच तनाव बढ्ने ठानिएको छ।
