ქართული კინოს აღორძინების რეცეპტი, რომელიც თვით გოგი გვახარიამაც არ იცის (და თუკი იცის, არ ამხელს) :)

ამერიკული კინო ბევრს უყვარს, ბევრს არ უყვარს, კიდევ უფრო მეტს ვითომ არ უყვარს, მაგრამ ფილმს არ ტოვებს, მაგრამ ყველა თანხმდება, რომ ბიზნესის თვალით თუ შევხედავთ, ჰოლივუდი და კო. მსოფლიოში ყველაზე წარმატებულია. არც ერთი რეჟისორი, პროდიუსერი თუ კინოსტუდია არ იტყოდა უარს ამგვარ შემოსავლებზე…

სადაა ჰოლივუდის საიდუმლო დამარხული? ყველაფერი ძალზედ მარტივი აღმოჩნდა – უბრალოდ, ჰოლივუდში იციან ჯადოსნური სიტყვა და ეს სიტყვაა FUCK!

ჯადოსნური სიტყვის პირველმიმგნები ბრაიან დე ფალმაა, რომლის ფილმში “ნაიარევი სახე” (Scarface) ჯადოსნური სიტყვა FUCK! საშუალოდ ყოველ 1,2 წუთში ერთხელ ისმის და აი, შედეგიც: ფილმის შემოსავალმა თითქმის 66 მილიონი აშშ დოლარი შაედგინა დახარჯული 25-ის სანაცვლოდ. “ნაიარევი სახე” 3 ოქროს გლობუსზე იყო წარდგენილი და IMDb რეიტინგში 8 ქულა აქვს 10-დან.

როგორც ცნობილია, ქვენთინ თარანთინომ თავისი “მაკულატურის” (Pulp Fiction) გადასაღებად ბევრი ფული ვერ მოაქუჩა, სულ რაღაც 8 მილიონი, რაზეც სულ არ უღელვია, ვინაიდან ჯადოსნური სიტყვა მანაც იცოდა. “მაკულატურაში” FUCK! ჟღერს ყოველ 1,7 წუთში ერთხელ. ფილმის შემოსავალმა 200 მილიონ აშშ დოლარს გადააჭარბა. დაიმსახურა კანის ფესტივალის ოქროს პალმის რტო, ოსკარი სცენარისთვის, ოქროს გლობუსი რეჟისურისთვის… ნომინაციებს აღარ ჩამოვთვლი. IMDb რეიტინგში “მაკულატურას” 9 ქულა აქვს 10-დან.

ან, ავიღოთ მართინ სქორსეზეს ფილმი “კარგი ბიჭები” (Goodfellas) – შემოსავალი 47 მილიონი აშშ დოლარი (ბიუჯეტი: 25 მილიონი), 6 ნომინაცია ოსკარზე, 5 ნომინაცია ოქროს გლობუსზე, ნომინაცია ფრანგულ სეზარზე, მოგებული ოსკარი (ჯო ფეში), BAFTA (მართინ სქორსეზე). 9 ქულა 10-დან IMDb რეიტინგში. ფილმში ჯადოსნური სიტყვა FUCK! ჟღერს ყოველ 2 წუთში ერთხელ.

იმავე რეჟისორის “კაზინო” (Casino) – 116 მილიონ აშშ დოლარზე მეტი შემოსავალი (ფილმის გადაღებისთვის 50 დაიხარჯა), ოქროს გლობუსის ნომინაცია საუკეთესო რეჟისურისთვის, ოსკარზე ნომინაცია საუკეთესო ქალი მსახიობისთვის, ოქროს გლობუსი საუკეთესო ქალი მსახიობისთვის, 8 ქულა 10-დან IMDb რეიტინგში. ფილმში ჯადოსნური სიტყვა FUCK! ჟღერს ყოველ 2,3 წუთში ერთხელ.

გახარებულმა სქორსეზემ, არიქა ეს რა საიდუმლოს მივაგენიო, ჯადოსნური სიტყვის გამოყენების ინტერვალი კიდევ უფრო შეამცირა – ფილმში “განდგომილები“ ( The Departed ), სადაც FUCK! უკვე  ყოველ 1,8 წუთში ერთხელ ჟღერს – შედეგად,  შემოსავალმა 290 მილიონ აშშ დოლარს მიაღწია (დახარჯული 83 მილიონის ნაცვლად), პლუს 4 ოსკარი (მათ შორის რეჟისორსა და სცენარისტს), უამრავი სხვა პრიზი და ნომინაცია. IMDb რეიტინგში – 8,5 ქულა 10-დან.

ძმებმა ქოენებმა “დიდი ლებოვსკი”-ს (The Big Lebowski)  გადასაღებად 15 მილიონი დახარჯეს, შემოსავალმა კი 46,5 მილიონი აშშ დოლარი შეადგინა. ბერლინისა და რამდენიმე სხვა კინოფესტივალის ნომინაცია, 8 ქულა 10-დან IMDb რეიტინგში. ფილმში ჯადოსნური სიტყვა FUCK! ჟღერს ყოველ 2,2 წუთში ერთხელ.

ფითერ ო’ფალონის “თვითმკვლელობის მეფენი” (Suicide Kings) – ფილმში ჯადოსნური სიტყვა FUCK! ჟღერს ყოველ 2 წუთში ერთხელ. მართალია, ჯილდოები მან ვერ მოიპოვა, სამაგიეროდ დახარჯული 5 მილიონის სანაცვლოდ 17 მილიონი აშშ დოლარი მოიტანა და 7 ქულა დაიმსახურა 10-დან IMDb რეიტინგში.

ამ სიის გაგრძელება კიდევ დიდხანს შეიძლება: თარანთინოს “ჯექი ბრაუნი” (Jackie Brown), ნეილ ბლომქამფის ფილოსოფიური კინოფანტასტიკა “მე-9 რაიონი” (District 9), ანთუან ფუქუას “სავარჯიშო დღე” (Training Day), ფითერ ბერგის შავი კომედია “საშინელი ამბები” (Very Bad Things), აბელ ფერარას “სახიფათო თამაში” (Dangerous Game), ქევინ სმითის “დოგმა” (Dogma)…

მაგრამ ყველაფერი ისედაც დღესავით ნათელია – კინკილა ლამბორჯინითა და შორენა ბეგაშვილის ძუძუებით ქართული კინო ფონს ვერ გავა.

ამიტომ, გაიღიმე და თქვი: ფაქ!

ოღონდ – გამოთქმით.

© Lord Vader. Stylish Blog.
საავტორო უფლებები დაცულია. ნამუშევრის კოპირება, ციტირება და გამოქვეყნება დაშვებულია მხოლოდ ავტორისა და წყაროს (პოსტზე ლინკის) მითითებითა და ნებართვით და მხოლოდ არაკომერციული მიზნებით. This work is licensed under a Creative Commons Attribution-NonCommercial 3.0 Unported License.

___
P.S.

ამ დღეებში სრულიად ქართული ბლოგოსფეროს ყურადღება კინოსა და ბათუმის კინოფესტივალისკენაა, ჰოდა მეთქი არც მე ჩამოვრჩე, რაღა…
რა სარგებლობა მოაქვს კინოს?
ბათუმის საერთაშორისო კინოფესტივალს ჯენა ჯემისონი დაამშვენებს!