仍記得當年未有小朋友時同day去過抱石，嗰次覺得好好玩(請參閱：6-7-2014：抱石運動初體驗＠Just Climb)，試咗堂一次就買咗10次套票，後來陀咗曉，即使陀B通常可以extend期限，但後來湊B湊到好攰都抽唔到時間機會體力再去玩~所以兩個開始大個，我又心思思想去玩下~
當年去過嘅Just Climb，9年後嘅今日多咗幾間分店，連屯門都開咗，我重新運動番之後，都有諗過去下，但平日開得晏，假日又唔可以賣甩佢哋自己去，所以一直未試~而家詩都五歲半，睇嚟都夠大個可以一齊玩，所以睇下最細幾多歲可以玩得，yeah，得呀﹗咁就報名一齊去玩啦~
詩開始咗暑假，曉其實未正式放假，就係暑期活動，開始放半晝嘅第一日下晝去玩啦~登記入場時職員好驚訝搵到我嘅舊record，後生仔教練都話我抱石嘅「年資」仲耐過佢，哈，我只係玩過只此一次咋~
興奮試鞋中
教練問我哋想一齊上定按年齡分開上，可以一齊梗係一齊啦，原來詩嘅年齡本來要安全帶，但教練問我意願，詩肯聽指令、運動神經唔錯、性格係重要事上都唔會亂嚟，所以我都覺得佢可以同我哋一齊上就可以~我睇番以前個blog，話牆係4米高，今次教練話唔超過6米(即是比以前高咗喎)~
上堂第一件事教我哋係牆上面點樣跳落地，向後跳，一個深蹲雙腳企好，唔好用手撐~我哋先係教練指導之下輪流爬幾條新手路線，教練要求我手腳都要跟路線顏色，對於小朋友開始時就寛鬆啲，手可以捉其他顏色嘅「粒粒」，到佢哋越來越純熟，越來越有信心時就提高要求了~
詩真係大膽詩，開頭仲戰戰兢兢，爬第二次上去已經用自己方法去到頂，唔怕高、夠力爬以第一次嚟講已經好叻~
曉就出名細膽曉，一路話驚一路爬上去，一路有進步，每次落地時都笑咪咪，一臉滿足嘅表情，仲話唔鍾意？
我最興奮嘅係，原來平時跟教練去gym時嘅重量訓練，原來真係有料到，睇番2014年嗰篇blog，我爬第二條路線已經爬唔掂，今次第二、三、四、五條教練建議嘅路線都係一take過完成，我都唔記得爬咗幾多條了，總之一個鐘頭內詩曉媽詩曉媽詩曉媽一人一次咁啦~教練問我平時係咪有運動開，果然一星期一至兩次嘅重訓真係有成果，練出嚟嘅肌肉雖然俾啲皮下脂肪遮住咗，但真係有力咗，同埋個人都輕咗添啦~再一次證明，年齡不代表甚麼，當年啱啱三字頭，而家接近四字頭了，體能比差唔多10年前更好呢~慘，爸爸唔係度，冇人幫我主動影相~
落咗堂我哋繼續玩多半個鐘添，可能消耗體力太多，係因為曉大嗌肚餓先要走，如果唔係佢哋一定想繼續玩~今次冇join套票或者報course呀，一來工廠區都有少少唔方便，二來抱石都比較貴，三來佢哋啲暑期活動都安排得好豐富了，睇下下次會唔會又係單次咁去玩一日啦~