Carme Rodríguez Alonso (ed.)
Un bosque novo. Antoloxía da poesía gaélica contemporánea
Editorial Trifolium, Musa pedestris, serie Clea, A Coruña, 121 páxinas, 16 €
Excelentes paréceronme as palabras prologais que subscribe a profesora Manuela Palacios para presentar un libro destas características, como igualmente espléndido o labor que desenvolve alguén como Carme Rodríguez Alonso, profesora que coñece ben a realidade literaria gaélica, para presentar e traducir unha escolma que inclúe trece voces contemporáneas da poesía irlandesa escrita en gaélico á lingua galega.
Goza de moitos valores este libro publicado por Trifolium e non é menor o feito de tender pontes entre dúas literaturas que, malia os factores de empatía que se deron entre elas, sempre viviron un tanto de costas. É ben probable que da nómina de voces antologadas -Máirtín Ó Direáin, Seán Ó Ríordáin, Maire Mhac An Tsaoi, Mícheál Ó Hairtnéide, Caitlín Maude, Gabriel Rosenstock, Liam Ó Muirthile, Nuala Ni Dhomhnaill, Cathal Ó Searcaigh, Louis de Paor, Michael Davitt, Pearse Hutchinson e Celia de Fréine- pouco digan mesmo a un lectorado avezado mais velaquí unha magnífica oportunidade para constatar a riqueza e polifonía que encerra esta tradición poética contemporánea que discorre por unha pluralidade de asuntos temáticos que van desde a propia supervivencia da lingua gaélica pasando polo espello da vida máis cotiá, desde a invitación á fuxida do materialismo que representan as cidades ata o deseño das relacións sentimentais e a sexualidade; desde a defensa da relevancia do papel da muller irlandesa na súa historia ata a exposición do conflito político; desde o emprego de dinámicas experimentalistas a outras que abrazan o humor, a ironía ou misticismo como trazos caracterizadores. Un imaxinario poético sen dúbida vizoso e suxestivo. Convido a coñecelo.
Caderno da crítica 